Një incident i rëndë ajror është regjistruar në aeroportin e Split, ku një avion pasagjerësh doli nga pista gjatë fazës së ngritjes, duke shkaktuar panik mes pasagjerëve, por pa viktima.

Bëhet fjalë për një Airbus A220-300 të kompanisë Croatia Airlines, me rreth 130 pasagjerë dhe 5 anëtarë ekuipazhi në bord, i cili po përgatitej të nisej drejt Frankfurt.

Sipas të dhënave paraprake, piloti ka vendosur të ndërpresë ngritjen në përputhje me procedurat e sigurisë, çka ka bërë që avioni të rrëshqasë jashtë pistës me një shpejtësi të lartë, të raportuar deri në rreth 240 km/h.

Linja ajrore konfirmoi se të gjithë pasagjerët dhe ekuipazhi janë të sigurt dhe nuk ka persona të lënduar. Pas ndalimit të avionit, udhëtarët janë evakuuar dhe janë akomoduar në terminalin e aeroportit.

Pamje të publikuara nga mediat lokale tregojnë avionin të ndalur në fund të pistës, me një nga motorët e dëmtuar dhe të pozicionuar mbi zonën me bar pranë aeroportit.

Damacijadanas.hr raportoi se ndërhyrja e ekuipazhit ishte në përputhje me procedurat standarde të sigurisë, ndërsa autoritetet aeroportuale dhe ekipet teknike kanë nisur hetimet për të përcaktuar shkaqet e sakta të incidentit.

Autoritetet pritet të publikojnë një raport zyrtar pas përfundimit të kontrolleve teknike dhe analizës së plotë të ngjarjes.