AUSTRALI – Një burrë 30-vjeçar ndodhet në gjendje kritike pas një sulmi nga një peshkaqen në Australinë Perëndimore, njoftuan shërbimet lokale të emergjencës.

Ngjarja ka ndodhur pak pas orës 10:00 sipas kohës lokale në bregdetin e ishullit Rottnest, pranë qytetit Perth.

Menjëherë pas incidentit, autoritetet kanë dërguar një helikopter shpëtimi në vendngjarje, ndërsa në operacion kanë marrë pjesë edhe policia e ishullit dhe ekipet e ndihmës së shpejtë.

“Helikopteri i shpëtimit është atje, së bashku me policinë e ishullit dhe shërbimet e emergjencës,” deklaroi një zëdhënës i Ambulancës së Shën Gjonit për AFP.

Deri më tani nuk janë bërë publike detaje të tjera mbi gjendjen e të plagosurit apo rrethanat e sakta të sulmit.