Mekanizmi Ndërkombëtar i Mbetur për Gjykatat Penale në Mekanizmi Ndërkombëtar i Mbetur për Gjykatat Penale në Haga ka rrëzuar kërkesën për lirim të ish-gjeneralit serb të Bosnjës, Ratko Mlladiç, i cili po vuan dënimin me burgim të përjetshëm për gjenocid dhe krime lufte.

Mlladiç kishte kërkuar lirimin e përkohshëm ose me kusht, duke argumentuar se ndodhet në gjendje të rënduar shëndetësore dhe “pranë vdekjes”, me qëllim transferimin në një spital të specializuar ose qendër kujdesi paliativ.

Vendimi u dha nga presidentja e IRMCT, Graciela Gatti Santana, e cila pranoi se gjendja e tij shëndetësore është “shumë serioze, në përkeqësim dhe pranë vdekjes”, por theksoi se kjo nuk përbën arsye për lirimin e tij.

Sipas vendimit, kushtet në Njësinë e Paraburgimit të OKB-së dhe në spitalin e burgut janë të mjaftueshme për të garantuar trajtimin e nevojshëm mjekësor, pa krijuar trajtim çnjerëzor apo të papërshtatshëm.

“Nuk ka trajtim shtesë të disponueshëm diku tjetër që nuk është i disponueshëm në Holandë”, thuhet në arsyetim.

Autoritetet theksojnë se Mlladiç ka përfituar prej vitesh trajtim të përshtatur për problemet e tij shëndetësore dhe se ka akses të vazhdueshëm në vizita familjare dhe kontakte me të afërmit.

Sipas vendimit, ai mund të shoqërohet nga familjarët edhe në momentet e fundit të jetës.

Avokatët e tij kishin argumentuar se gjendja e tij është e pakthyeshme dhe se ai duhet të transferohej në kujdes paliativ, por kërkesa u refuzua.

Ratko Mlladiç u dënua përfundimisht në vitin 2021 për gjenocidin në Srebrenicë, si dhe për persekutimin e civilëve boshnjakë dhe kroatë gjatë luftës së viteve 1992–1995, rrethimin e Sarajevë dhe marrjen peng të paqeruajtësve të OKB-së.