Nga Mero Baze

Hallet e Berishës jo gjithmonë shërbejnë për keq. Ja për shembull sot shërbyen për mirë. Sulmi i tij ndaj ambasadorit Gonzato dhe fjalori agresiv ndaj tij, nxiti një reagim konsensual të gjithë ambasadorëve të Bashkimit Evropian kundër Sali Berishës, duke ia përforcuar kështu atij rrethimin anglo-amerikan.

Ambasadori i Britanisë së Madhe një ditë më parë e telendisi publikisht për “non grata”-n e Mbretërisë së Bashkuar, duke e trajtuar Sali Berishën si një njeri të ndëshkuar nga drejtësia britanike dhe jo nga politika britanike. Edhe më të ashpra ishin qëndrimet e tij për qasjen bllokuese të opozitës si formë opozitarizmi.

E gjithë kjo ishte një taksë e panevojshme mbi opozitën për shkak të Sali Berishës. Njeriu që do rizgjidhet në krye të opozitës pa garë pas një jave, ia bëri të qartë perspektivën e zezë partisë së tij, nën drejtimin e tij, duke u vetëshpallur si armik i BE, Britanisë së Madhe dhe SHBA.

Dhe i prodhoi vetes dhe PD-së një hall që mund ta kishte shmangur.

Nga ana tjetër, vetë Berisha ka dy javë që bën një propagandë bajate lidhur me aprovimin e IBAR për Shqipërinë, i furnizuar dhe nga burime të tij diplomatike në pushtet. Është normale që procesi me 27 vende ka hezitimet e veta që shpesh varen dhe nga predispozita politike e forcave politike në pushtet në vendet ku zgjerimi shkakton probleme politike. Për fat Shqipëria nuk është në agresion fatal dhe ndoshta në fund të muajit, duke u nxitur dhe nga gëzimi i pakujdesshëm i Berishës për procesin e shqyrtimit të IBAR, ai mund të aprovohet. Tani këtë e ka kuptuar dhe Berisha dhe me sa duket do që pas zgjedhjes së tij të thotë që “na e aprovuan IBAR-in se u rizgjodha unë kryetar i PD”.

I gjithë ky agresion kundër BE dhe reagimet ndërkombëtare kundër tij, natyrisht që kanë krijuar një klimë dëshpërimi në PD dhe kanë sterrosur procesin e rizgjedhjes së tij sikur të jetë një funeral dhe jo një ditë feste, siç është për çdo parti.

Prandaj mos u çudisni nga rezoluta e sotme dhe mos krijoni teori konspiracioni rreth Gazit, Taulantit, Romina-s apo të tjerëve. Meritën kryesore për rezolutën e ka beteja antiperëndimore e Berishës dhe propaganda bajate e tij për bllokimin e procesit të Shqipërisë, që nuk është e vërtetë. Tani kur e kuptoi që as procesin e integrimit nuk e ndal dot, as BE nuk e shantazhon dot duke sulmuar ambasadorët dhe as “non grata”-n nuk e heq qoftë dhe me lekë, i ra shkurt dhe tha ta pranojmë këtë rezolutën se ndoshta nga fundi i muajit më përshëndesin dhe mua për këtë dhe ta shes si përshëndetje për rizgjedhjen. Kaq është e gjitha.

Kjo është e mira që prodhojnë hallet e Berishës për Shqipërinë në këtë rast. Jo çdo e keqe për të sjell të keqe dhe për Shqipërinë. Ja në këtë rast e ka kuptuar se e vetmja rrugë i ka mbetur të bëjë sikur gëzon bashkë me shqiptarët e tjerë për Shqipërinë.