18 minatorët që mbetën të bllokuar për disa orë në minierën e Stantërgut kanë dalë në sipërfaqe, pas problemeve të shkaktuara nga ndërprerja e energjisë elektrike.

Sipas njoftimit të kompanisë metalurgjike Trepça, minatorët kishin mbetur të ngujuar qindra metra nën tokë që nga ora 01:30 e mëngjesit të 14 majit. Në momentin e ndërprerjes së energjisë në minierë ndodheshin 47 punëtorë, ndërsa 29 prej tyre arritën të dilnin menjëherë në sipërfaqe.

Kompania bëri me dije se problemi u shkaktua pas dëmtimit të një përcjellësi në hyrje të trafostacionit të flotacionit, çka solli dëmtimin e izolatorëve dhe djegie në transformatorin që furnizon minierën me energji elektrike.

“Sipas informatave nga terreni, në hyrje të trafostacionit në flotacion është shkëputur një përcjellës i linjës, ndërsa si pasojë janë dëmtuar izolatorët përcjellës, duke shkaktuar djegie në trafon që furnizon flotacionin me energji elektrike”, thuhet në reagimin zyrtar.

Ndërmarrja sqaroi se minatorët e bllokuar në Miniera e Stantërgut kanë qenë në gjendje të sigurt gjatë gjithë kohës, ndërsa ekipet e Trepçës dhe KEDS punuan për rikthimin e furnizimit me energji elektrike dhe nxjerrjen e tyre me ashensorë.

Ngjarje të ngjashme janë regjistruar edhe më herët në minierat e Trepçës. Në vitin 2023, disa minatorë mbetën të bllokuar për orë të tëra nën tokë për shkak të një defekti në sistemin energjetik të ashensorit.

Sindikatat e minatorëve kanë ngritur vazhdimisht shqetësime për kushtet e punës dhe sigurinë në miniera, duke kërkuar ndërhyrje dhe investime për përmirësimin e kushteve teknike.

Get smarter responses, upload files and images, and more. Log in Sign up for free