Rritja e çmimeve në Kosovë ka vijuar edhe gjatë muajit prill 2026, me inflacionin që ka arritur në 7,5% krahasuar me të njëjtën periudhë të vitit të kaluar. Sipas të dhënave të publikuara nga Agjencia e Statistikave të Kosovës, është shënuar gjithashtu një rritje mujore prej 1,1%, duke reflektuar vazhdimin e presioneve mbi koston e jetesës.

Sipas raportit, rritja vjetore është ndikuar kryesisht nga shtrenjtimi i transportit me 16,1%, si dhe i shpenzimeve për strehim, ujë, energji elektrike, gaz dhe lëndë djegëse, të cilat janë rritur me 15,2%.

Rritje janë regjistruar edhe në kategori të tjera të konsumit, përfshirë ushqimet dhe pijet joalkoolike me 5,6%, restorantet dhe shërbimet e akomodimit me 5,8%, si dhe pijet alkoolike, duhanin dhe narkotikët me 5,1%. Po ashtu, janë shënuar rritje në shëndetësi, kujdes personal, mobilje, rekreacion dhe veshje e këpucë, por me ritme më të ulëta.

Në krahasim mujor, inflacioni prej 1,1% është ndikuar sërish kryesisht nga transporti, me një rritje prej 4,9% brenda një muaji. Rritje janë regjistruar edhe në disa grupe të tjera të konsumit, ndërsa rënie janë shënuar në shërbimet e informacionit dhe komunikimit, si dhe në sektorin e arsimit.

Raporti thekson se presionet inflacioniste vazhdojnë të ndikojnë ndjeshëm në buxhetin e familjeve në Kosovë, me rritjen e çmimeve në disa nga sektorët bazë të konsumit.