Eurovision Song Contest 2026 ka ndezur atmosferën në Wiener Stadthalle, ku mijëra fansa nga e gjithë Europa janë mbledhur për edicionin e 70-të të festivalit më të madh muzikor evropian.

Nën moton “Të Bashkuar nga Muzika”, këtë vit 35 shtete konkurrojnë për trofeun e Eurovisionit, ndërsa Austria rikthehet si vend organizator pas 11 vitesh, falë fitores së JJ në edicionin e kaluar.

Shqipëria përfaqësohet këtë vit nga Alis me këngën Nan, një baladë emocionale që sjell në qendër figurën e nënës dhe lidhjen familjare në kulturën shqiptare.

Performanca e artistit shqiptar është komentuar pozitivisht nga media dhe ndjekës të festivalit, ndërsa interpretimi është vlerësuar për kombinimin e thjeshtësisë artistike me elementët emocionalë dhe motive të forta muzikore. Vëmendje ndaj këngës shqiptare kanë treguar edhe media ndërkombëtare, përfshirë BBC .

Mbrëmjen e sotme, Alis do të performojë në gjysmëfinalen e dytë të Eurovision Song Contest 2026, ku Shqipëria synon një vend në finalen e madhe të së shtunës.

Mbështetja e diasporës shqiptare konsiderohet vendimtare për kualifikimin. Shtetet pjesëmarrëse mund të votojnë për Shqipërinë duke përdorur numrin 13, kodi zyrtar i këngës Nan, ndërsa publiku nga vendet jo pjesëmarrëse mund të votojë online gjatë gjithë ditës së 14 majit, pas transmetimit live të performancës.

Edicioni i këtij viti po konsiderohet një nga më spektakolarët e viteve të fundit, duke bashkuar artistë, kultura dhe stile muzikore nga e gjithë Europa në një skenë të vetme.