Rritja e vazhdueshme e çmimeve të karburanteve në tregun vendas ka vënë në vështirësi operatorët e transportit publik, të cilët kërkojnë zgjatjen edhe me tre muaj të skemës së kompensimit për naftën.

Sipas përfaqësuesve të sektorit, prej gati tre muajsh çmimet e karburanteve vijojnë të mbeten në nivele të larta, situatë e ndikuar nga tensionet dhe konflikti në Iran, duke rritur ndjeshëm kostot e operimit për transportin publik qytetas, rrethqytetas dhe ndërqytetas.

Në këto kushte, Shoqata e Transportit Publik Qytetas i është drejtuar qeverisë me një kërkesë zyrtare për shtyrjen e periudhës së kompensimit financiar për muajt korrik–shtator 2026.

Në mbledhjen e fundit, qeveria miratoi kompensimin e naftës në masën 50 lekë për litër për periudhën mars–maj. Megjithatë, operatorët argumentojnë se vijimi i çmimeve të larta të karburantit po rëndon ndjeshëm barrën financiare të kompanive të transportit.

Në letrën drejtuar institucioneve shtetërore, përfshirë Ministrinë e Pushtetit Vendor, Ministria e Financave dhe Ministrinë e Energjisë, shoqata kërkon që masa mbështetëse të vijojë me të njëjtat procedura dhe kritere të përcaktuara në aktin normativ në fuqi.

Përfaqësuesit e transportit publik theksojnë se zgjatja e kompensimit është e domosdoshme për të garantuar vazhdimësinë e shërbimit ndaj qytetarëve, shmangien e reduktimit të flotës dhe frekuencave të autobusëve, si edhe ruajtjen e balancës financiare të operatorëve të licencuar.

Sipas tyre, karburanti përbën një nga kostot kryesore të aktivitetit dhe rritja e çmimeve po e vështirëson përmbushjen e detyrimeve financiare të kompanive të sektorit.

Përpara miratimit të skemës aktuale të kompensimit, Shoqata Kombëtare e Transportit Qytetas dhe Shoqata e Transportit Urban dhe Interurban kishin paralajmëruar vazhdimisht institucionet për pasojat financiare që po shkaktonte rritja e çmimit të naftës.

Më 1 prill, operatorët zhvilluan edhe një takim me ministren Delina Ibrahimaj, ku kërkuan rikthimin e skemës së vitit 2022. Në atë periudhë, për shkak të krizës së çmimeve, kompanitë e transportit u kompensuan për gjashtë muaj me 100 lekë për litër karburant.

Për shkak të mosplotësimit të kërkesave të tyre, operatorët reduktuan për gati dy ditë flotën e autobusëve në Tiranë dhe në disa qytete të tjera të vendit, duke ulur numrin e mjeteve në qarkullim deri në 60 për qind.