Ekspertët europianë të shëndetit dhe sigurisë kanë ngritur shqetësimin se shumë ashensorë në ndërtesa nuk janë më të përshtatur me peshën aktuale mesatare të popullsisë, ndërsa obeziteti po kthehet në një fenomen global me ndikim edhe në infrastrukturën urbane.

Në një kongres europian të zhvilluar në Stamboll, specialistët prezantuan një studim mbi ndikimin e rritjes së peshës trupore tek përdorimi i ashensorëve. Sipas tyre, standardet ekzistuese të industrisë janë të vjetruara dhe në disa raste mund të paraqesin rrezik për sigurinë.

Aktualisht, shumica e sistemeve të ashensorëve bazohen në një peshë mesatare prej 75 kilogramësh për person. Megjithatë, ekspertët theksojnë se në dekadat e fundit pesha mesatare e popullsisë është rritur ndjeshëm, ndërsa prodhuesit nuk kanë reflektuar këtë ndryshim në parametrat teknikë.

Studimi analizoi 112 ashensorë të instaluar nga viti 1970 deri në vitin 2024 në vende si Italia, Franca, Gjermania, Spanja dhe Mbretëria e Bashkuar. Sipas rezultateve, disa kompani kishin rritur kufijtë e peshës deri në fillim të viteve 2000, por pas vitit 2002 përditësimet janë ndalur pothuajse plotësisht.

Ekspertët paralajmërojnë se problemi nuk lidhet vetëm me komoditetin, por edhe me standardet e sigurisë. Ata kërkojnë rishikimin e mënyrës së llogaritjes së kapacitetit të ashensorëve, duke marrë në konsideratë jo vetëm numrin e personave, por edhe hapësirën dhe peshën reale të përdoruesve.

Sipas studiuesve, një person me peshë normale ka nevojë për rreth 0.21 metra katrorë hapësirë brenda ashensorit. Ata shtojnë se standardet aktuale mund të çojnë edhe në stigmatizim social ndaj personave obezë, pasi numri i lejuar i pasagjerëve shpesh nuk përputhet me hapësirën reale të disponueshme.