Një mësuese 43-vjeçare ka treguar një akt të lartë ndershmërie në Ferizaj, pasi ka gjetur një portofol me mbi 2000 euro dhe e ka dorëzuar menjëherë në polici.

Sipas njoftimit zyrtar, mësuesja ka dorëzuar portofolin në komisariatin më të afërt, pasi brenda tij ndodheshin rreth 2030 euro.

Policia e Kosovës ka bërë të ditur se, meqë pronari fillimisht nuk ishte identifikuar, hetuesit kanë nisur verifikimet në terren dhe kanë analizuar pamjet e kamerave të sigurisë në zonën ku është gjetur portofoli.

Më pas, në komisariat është paraqitur një qytetare 22-vjeçare me inicialet L.K., nga Ferizaj me banim të përkohshëm në Gjermani, e cila ka raportuar humbjen e portofolit.

Pas verifikimeve të kryera, policia ka konfirmuar pronësinë dhe i ka kthyer qytetares portofolin së bashku me shumën e parave prej 2030.85 euro. Ky rast është vlerësuar si një shembull pozitiv i përgjegjësisë qytetare dhe ndershmërisë në komunitet.