Studentë të drejtësisë nga universitetet shqiptare në Maqedoninë e Veriut kanë njoftuar vijimin e protestave, duke kërkuar që provimi i jurisprudencës të zhvillohet në gjuhën shqipe.

Pas protestave të zhvilluara në Shkup, ata kanë bërë të ditur se do të vazhdojnë me tubime dhe aktivitete deri në plotësimin e kërkesave të tyre. Sipas organizatorëve, nisma pritet të shtrihet edhe në qytete të tjera të vendit, përmes debateve dhe takimeve studentore.

Organizatori i protestave, Mevlan Ademi, deklaroi se qëllimi kryesor është bashkimi i studentëve shqiptarë dhe sigurimi i përdorimit të gjuhës shqipe në institucionet përkatëse, përfshirë edhe procesin e provimit të jurisprudencës.

“Takohemi me studentët e Kumanovës, dëgjojmë sugjerimet e tyre dhe synojmë një qëndrim të përbashkët. Bashkimi i studentëve shqiptarë është shumë i rëndësishëm për ne”, u shpreh Ademi.

Edhe studentja Arlinda Emini theksoi se takimet kanë për qëllim koordinimin e mëtejshëm të protestave dhe informimin e sa më shumë studentëve mbi kërkesat e tyre.

“Qëllimi i këtij takimi ishte të diskutojmë për protestën e realizuar dhe të vazhdojmë në mënyrë të njëjtë, si dhe të informojmë sa më shumë studentë mbi çështjen e provimit të Jurisprudencës”, deklaroi ajo.

Studentët kërkojnë që e drejta për përdorimin e gjuhës shqipe në proceset akademike dhe institucionale të respektohet plotësisht, duke e cilësuar këtë si një çështje me rëndësi të veçantë për ta.