Tre persona kanë humbur jetën pas një shpërthimi të dyshuar të Hantavirus në një anije turistike në Oqeani Atlantik, duke rikthyer shqetësimet mbi përhapjen e sëmundjeve infektive gjatë udhëtimeve me kroçera.

Ekspertët e shëndetit publik paralajmërojnë se anijet turistike krijojnë kushte të favorshme për përhapjen e viruseve dhe baktereve, pasi pasagjerët dhe ekuipazhi kalojnë periudha të gjata në ambiente të përbashkëta dhe shpesh të mbyllura.

Megjithatë, Organizata Botërore e Shëndetësisë ka bërë me dije se rreziku nga hantavirusi për publikun mbetet aktualisht i ulët dhe nuk ekzistojnë arsye për kufizime udhëtimi apo panik.

Sipas autoriteteve shëndetësore amerikane, problemet më të zakonshme në kroçera lidhen me viruset gastrointestinale, veçanërisht Norovirusi, i cili përhapet me shpejtësi dhe shkakton simptoma si të vjella dhe diarre.

Ekspertët theksojnë se shqetësim mbeten edhe infeksionet respiratore, përfshirë Gripi, COVID-19 dhe RSV, të cilat favorizohen nga grumbullimet në restorante, teatro dhe kabina të mbipopulluara.

Një tjetër rrezik potencial lidhet me bakterin Legionella, i cili mund të zhvillohet në sistemet e ujit të anijeve, përfshirë dushet dhe hidromasazhet.

Specialistët paralajmërojnë gjithashtu se pasagjerët mund të ekspozohen ndaj sëmundjeve të transmetuara nga insektet gjatë ndalesave në porte të ndryshme turistike.

Mjekët këshillojnë udhëtarët të respektojnë masat bazë të higjienës, të lajnë shpesh duart, të shmangin kontaktet kur ndihen të sëmurë dhe të raportojnë menjëherë çdo simptomë në qendrat mjekësore të anijeve.

Sipas ekspertëve, kujdesi personal dhe masat parandaluese mbeten mënyra më efektive për të shmangur infeksionet gjatë pushimeve me kroçera.