Hantavirusi në SHBA më i egër se në Evropë: Si transmetohet dhe pse ekspertët nuk po alarmohen

Alarm ndërkombëtar ka shkaktuar shpërthimi i rasteve me hantavirus në kroçierën holandeze MV Hondius, pasi incidenti u lidh me virusin Andes, i vetmi variant i njohur i hantavirusit që mund të transmetohet, edhe pse shumë rrallë, nga njeriu te njeriu.

Megjithatë, ekspertët shëndetësorë po japin mesazhe qetësuese. Qendra Evropiane për Parandalimin dhe Kontrollin e Sëmundjeve (ECDC) dhe Organizata Botërore e Shëndetësisë sqarojnë se rreziku për shëndetin publik mbetet i ulët dhe nuk ka shenja që mund të çojnë në një pandemi të re.

Në të njëjtën linjë është edhe profesori i epidemiologjisë në Universitetin e Athinës, Gika Majorkini, i cili shpjegon se edhe pse virusi i Andeve është i vetmi variant i hantavirusit me transmetim të dokumentuar mes njerëzve, kjo ndodh vetëm në raste shumë të kufizuara dhe kërkon kontakt shumë të afërt dhe të zgjatur.

“Nuk ka rrezik për një pandemi nga hantavirusi,” deklaroi ai, duke theksuar se nuk ka arsye për shqetësim për përhapje të gjerë jashtë kroçierës.

Hantaviruset ekzistojnë prej mijëra vitesh

Sipas ekspertëve, hantaviruset nuk janë viruse të reja. Ato ekzistojnë prej mijëra vitesh dhe transmetohen kryesisht nga brejtësit.

Në Amerikën Latine qarkullojnë variantet e ashtuquajtura të “Botës së Re”, ku bën pjesë edhe virusi ANDV. Këto variante lidhen kryesisht me sindroma të rënda respiratore dhe konsiderohen më agresive.

Ndërsa variantet që qarkullojnë në Evropë, përfshirë edhe ato të identifikuara në Greqi, zakonisht shkaktojnë forma më të lehta të sëmundjes dhe nuk transmetohen nga njeriu te njeriu.

Majorkini thotë se viruset evropiane kanë rrezikshmëri shumë më të ulët krahasuar me variantet e Amerikës Latine dhe se komuniteti shkencor i njeh prej kohësh karakteristikat e tyre.

Sa i rrezikshëm është?

Sipas vlerësimeve, shkalla e vdekshmërisë për variantet e Amerikës Latine llogaritet nga 10% deri në 30%, megjithëse ekspertët besojnë se këto shifra mund të jenë më të larta se realiteti, pasi shumë raste të lehta nuk diagnostikohen kurrë.

Organizata Botërore e Shëndetësisë vlerëson se çdo vit regjistrohen nga 10 mijë deri në 100 mijë raste me hantavirus në botë, me ashpërsi që ndryshon sipas variantit.

Për variantet evropiane, rreziku për vdekje konsiderohet dukshëm më i ulët.

Aktualisht nuk ekziston as vaksinë dhe as trajtim specifik kundër hantavirusit. Mjekimi mbetet mbështetës dhe fokusohet në trajtimin e simptomave.

Simptomat

Në Amerikë, hantavirusi mund të shkaktojë sindromë të rëndë kardiopulmonare.

Në Evropë, simptomat zakonisht fillojnë me:

temperaturë të lartë

dobësi dhe lodhje

dhimbje trupore

probleme me frymëmarrjen në raste të caktuara

dëmtim të funksionit të veshkave në disa pacientë

Simptomat zakonisht shfaqen nga 1 deri në 8 javë pas ekspozimit ndaj virusit, ndërsa mesatarja e inkubacionit është rreth 2 javë.

Si transmetohet?

Transmetimi ndodh kryesisht përmes kontaktit me:

urinën e brejtësve të infektuar

jashtëqitjet e tyre

sekrecione biologjike

pluhur të kontaminuar në ambiente të mbyllura

Për këtë arsye rreziku është më i lartë në:

magazina

zona rurale

shtëpi të mbyllura për kohë të gjatë

ambiente me prezencë brejtësish

Masat mbrojtëse

Ekspertët rekomandojnë:

pastrim të kujdesshëm të ambienteve

dezinfektim të rregullt

kontroll ndaj brejtësve

përdorim dorezash dhe maskash gjatë pastrimit të vendeve të dyshuara

Mesazhi i ekspertëve është i qartë: situata po monitorohet, por nuk ka arsye për panik apo frikë për një pandemi të re globale.