Kreu i Organizata Botërore e Shëndetësisë, Tedros Adhanom Ghebreyesus, ka reaguar pas shqetësimeve të ngritura lidhur me rrezikun e mundshëm nga hantavirusi, duke theksuar se situata aktuale nuk duhet krahasuar me pandeminë e COVID-19.

Në një letër publike drejtuar banorëve të Tenerife, kreu i OBSH-së pranoi shqetësimin e qytetarëve, sidomos për shkak të kujtimeve të forta të pandemisë së vitit 2020.

“E di që jeni të shqetësuar. E di që kur dëgjoni fjalën ‘shpërthim’ dhe shikoni një anije që lundron drejt brigjeve tuaja, shfaqen kujtime që asnjëri prej nesh nuk i ka harruar plotësisht. Dhimbja e vitit 2020 është ende reale dhe unë nuk e shpërfill atë për asnjë moment,” thuhet në deklaratën e tij.

Megjithatë, Ghebreyesus theksoi se vlerësimi aktual i ekspertëve të OBSH-së mbetet i qartë: rreziku për shëndetin publik konsiderohet i ulët.

“Ky është vlerësimi i OBSH-së dhe ne nuk e bëjmë atë lehtë,” u shpreh ai, duke synuar të qetësojë opinionin publik dhe të shmangë panikun e panevojshëm.

Deklarata vjen në një moment kur raportimet mbi raste të lidhura me hantavirusin kanë rikthyer frikën globale për përhapjen e sëmundjeve infektive, ndërsa autoritetet shëndetësore ndërkombëtare vijojnë monitorimin e situatës.