Drejtoria e Përgjithshme e Shërbimeve të Transportit Rrugor ka publikuar të dhënat e kontrollit teknik të automjeteve për periudhën janar-prill 2026, duke bërë të ditur se mijëra mjete janë testuar në Qendrat e Kontrollit Teknik në të gjithë vendin.

Sipas DPSHTRR-së, gjatë katër muajve të parë të vitit janë kontrolluar gjithsej 126 719 mjete të kategorive të ndryshme, në kuadër të verifikimeve periodike që synojnë rritjen e sigurisë rrugore dhe garantimin e standardeve teknike të automjeteve që qarkullojnë në rrugët e vendit.

Pjesën më të madhe të mjeteve të testuara e përbëjnë automjetet e kategorisë 4+1 dhe 8+1 vende. Konkretisht, janë kontrolluar 112 164 automjete të kësaj kategorie, ose 88.5% e totalit të mjeteve të testuara.

Ndërkohë, kontrolleve teknike iu nënshtruan edhe:

6 888 kamionë, ose 5.4% e totalit; 5 494 motomjete, ose 4.3%; 1 261 autobusë; 483 rimorkio; 429 mjete ndërtimi dhe punimi toke. Mbi 2 500 mjete çregjistrohen përfundimisht

Sipas të dhënave zyrtare, 2 538 automjete me moshë mesatare 22-vjeçare janë çregjistruar përfundimisht gjatë kësaj periudhe, shifër kjo 35.3% më e lartë krahasuar me të njëjtën periudhë të vitit 2025.

DPSHTRR sqaron se arsyet kryesore të nxjerrjes jashtë qarkullimit të këtyre mjeteve lidhen me mungesën e standardeve të sigurisë, amortizimin e lartë, konsumimin e tepërt dhe mosplotësimin e kushteve teknike.

Sipas institucionit, ky proces ndikon drejtpërdrejt në rritjen e sigurisë rrugore dhe në kufizimin e qarkullimit të automjeteve që paraqesin rrezik për përdoruesit e rrugës.

Drejtoria e Përgjithshme e Shërbimeve të Transportit Rrugor thekson se kontrolli teknik mbetet një nga mekanizmat kryesorë për uljen e riskut të aksidenteve dhe respektimin e standardeve teknike dhe mjedisore nga drejtuesit e mjeteve.