Alarm i ri shëndetësor është ngritur në industrinë e kroçierave turistike, pasi pas shqetësimit për rastet me hantavirus, një tjetër shpërthim infektiv ka goditur një anije luksoze në Karaibe. Këtë herë bëhet fjalë për norovirusin, një virus shumë ngjitës që shkakton probleme serioze gastrointestinale dhe është përhapur me shpejtësi në bordin e kroçierës “Caribbean Princess”.

Sipas autoriteteve shëndetësore amerikane, mbi 100 pasagjerë dhe anëtarë të ekuipazhit kanë shfaqur simptoma të forta të sëmundjes, duke rikthyer shqetësimet për sigurinë shëndetësore gjatë udhëtimeve me kroçierë.

Mbi 100 të prekur në kroçierën luksoze në Karaibe

Qendrat Amerikane për Kontrollin dhe Parandalimin e Sëmundjeve (CDC) kanë bërë të ditur se deri tani janë konfirmuar 102 pasagjerë dhe 13 anëtarë të ekuipazhit me simptoma që lidhen me norovirusin.

Personat e prekur kanë shfaqur të vjella, diarre dhe shqetësime të forta gastrointestinale, simptoma tipike të këtij virusi shumë ngjitës.

Menjëherë pas konstatimit të rasteve, të infektuarit janë izoluar nga pjesa tjetër e pasagjerëve, ndërsa në anije janë aktivizuar masa emergjente dezinfektimi dhe mbrojtjeje sanitare.

Kroçiera “Caribbean Princess”, e operuar nga kompania Princess Cruises, u nis më 28 prill 2026 nga Port Everglades në Fort Lauderdale të Floridës dhe pritet të rikthehet më 11 maj.

Sipas të dhënave të CruiseMapper, anija ndodhej pranë brigjeve veriore të Republikës Domenikane dhe kishte të planifikuar një ndalesë në Nassau, Bahamas.

Çfarë deklaroi kompania Princess Cruises

Kompania konfirmoi incidentin, por e minimizoi situatën duke e përshkruar si një numër të kufizuar rastesh me sëmundje të lehtë gastrointestinale.

Sipas deklaratës zyrtare, çdo hapësirë e anijes është dezinfektuar menjëherë dhe masat higjienike janë forcuar gjatë gjithë udhëtimit.

Kompania bëri të ditur gjithashtu se anija do t’i nënshtrohet një pastrimi dhe dezinfektimi të plotë përpara nisjes së udhëtimit të ardhshëm.

Megjithatë, nuk është dhënë ende asnjë shpjegim i qartë se si nisi përhapja e virusit në bord.

Në këtë kroçierë ndodhen gjithsej 3.116 pasagjerë dhe 1.131 anëtarë ekuipazhi.

Çfarë është norovirusi?

Norovirusi njihet si një nga viruset më ngjitëse që shkakton gastroenterit akut.

Ai përhapet shumë lehtë:

përmes kontaktit të afërt me persona të infektuar

përmes sipërfaqeve të kontaminuara

nga ushqimet e infektuara

përmes ujit të ndotur

Simptomat kryesore janë:

të vjella të forta

diarre

dhimbje barku

të përziera

dobësi fizike

Sipas NHS britanik, simptomat zakonisht zgjasin rreth 1 deri në 2 ditë, por përhapja e virusit mund të jetë shumë agresive, sidomos në ambiente të mbyllura dhe me densitet të lartë njerëzish, siç janë kroçierat.

Shqetësim paralel edhe për hantavirusin

Ky incident vjen në një moment kur autoritetet shëndetësore po ndjekin paralelisht edhe një tjetër rast alarmues në kroçierën MV Hondius, të kompanisë Oceanwide Expeditions.

Në atë anije janë raportuar raste me hantavirus, një infeksion shumë më serioz dhe potencialisht vdekjeprurës.

Sipas raportimeve, mbi 140 pasagjerë dhe anëtarë ekuipazhi ndodhen ende në bord, ndërsa anija po lëviz drejt Ishujve Kanarie.

Deri tani janë raportuar të paktën tre viktima dhe disa persona të tjerë të sëmurë.

Ekspertët sqarojnë se hantavirusi është shumë më i rrezikshëm se norovirusi, por përhapet shumë më vështirë, zakonisht përmes kontaktit me sekrecione apo jashtëqitje brejtësish.

Organizata Botërore e Shëndetësisë ka deklaruar se rreziku për publikun e gjerë mbetet i ulët.

Megjithatë, dy shpërthime infektive në një kohë kaq të shkurtër në kroçiera turistike po ngrenë pikëpyetje serioze për protokollet e sigurisë shëndetësore në këto mjete udhëtimi luksoze.