Një mjet detar pa pilot është gjetur pranë Kepit Doukato në Lefkada, duke ngritur shqetësim te autoritetet greke për origjinën dhe qëllimin e tij.

Sipas mediave greke, mjeti u zbulua nga peshkatarë të zonës së Vasilikit, të cilët e gjetën të fshehur brenda një shpelle, me sistemin e motorit ende në funksion.

Bëhet fjalë për një USV (Unmanned Surface Vehicle), një anije sipërfaqësore pa pilot e pajisur me sensorë, antena dhe sisteme të avancuara komunikimi, që përdoret zakonisht për misione ushtarake, mbikëqyrje apo operacione të specializuara.

Ende nuk është përcaktuar origjina e pajisjes, ndërsa autoritetet po hetojnë nëse ajo ka hyrë në ujërat greke gjatë ndonjë stërvitjeje ushtarake apo në rrethana të tjera të paqarta.

Pas gjetjes, peshkatarët e kanë tërhequr mjetin drejt portit të Vasilikit, ku më pas ka ndërhyrë Roja Bregdetare Greke, e cila e ka marrë në dorëzim për verifikime të mëtejshme.

Për rastin janë njoftuar edhe strukturat ushtarake dhe shërbimet e sigurisë në Greqia, ndërsa hetimet vijojnë për të përcaktuar funksionin dhe prejardhjen e mjetit të dyshuar si ushtarak.