Komisioni Qendror i Zgjedhjeve Kosovë (KQZ) ka miratuar kërkesat dhe specifikimet teknike për shtypjen e materialeve zgjedhore në kuadër të zgjedhjeve të parakohshme për Kuvendin e Kosovës, të planifikuara të mbahen më 7 qershor 2026.

Vendimi përfshin fletëvotimet, broshurat me kandidatët dhe listat e votuesve, si pjesë e përgatitjeve për procesin zgjedhor.

Sipas KQZ-së, numri i përafërt i fletëvotimeve që pritet të shtypen është rreth 1,840,000 copë, ndërsa numri përfundimtar do të përcaktohet në një fazë të mëvonshme të procesit.

Ndërkohë, bazuar në raportin e Listës Preliminare të Votuesve, numri i qytetarëve me të drejtë vote për këto zgjedhje arrin në 2,092,202.

Zgjedhjet e parakohshme për Kuvendin e Kosovës pritet të zhvillohen më 7 qershor, ndërsa autoritetet zgjedhore vijojnë përgatitjet për garantimin e një procesi të rregullt dhe transparent.