Një ngjarje e rëndë është regjistruar në Gjakovë, ku një i ri ka humbur jetën pas një konflikti që përfundoi me përdorimin e thikës.

Ngjarja ka ndodhur në orët e para të mëngjesit të 5 majit 2026, rreth orës 02:20, në rrugën “Mbretëresha Teuta”. Viktima, Rexhë Brahimaj, është paraqitur fillimisht në QKMF me plagë të rënda në zonën e gjoksit.

Sipas mjekëve, ai ka mbërritur me shenja jete dhe në gjendje të vetëdijshme, por gjatë transportimit me autoambulancë drejt Spitalit Rajonal “Isa Grezda”, gjendja e tij është përkeqësuar dhe sot rreth orës 03:10 ka ndërruar jetë.

Nga dëshmitë e mbledhura në vendngjarje, bëhet me dije se konflikti ka nisur si debat verbal dhe më pas ka kaluar në përleshje fizike.

Gjatë përplasjes, i dyshuari dyshohet se ka përdorur një mjet prerës dhe e ka goditur viktimën në gjoks.

Policia ka ndërhyrë dhe ka nisur hetimet, duke marrë në pyetje disa persona që kanë qenë të pranishëm në momentin e ngjarjes.

I dyshuari, Qazim Sadrija, është identifikuar dhe shpallur në kërkim, ndërsa vijon puna për kapjen e tij.

Me urdhër të Prokurorit për Krime të Rënda, rasti është regjistruar si “Vrasje”, ndërsa trupi i viktimës është dërguar në Institutin e Mjekësisë Ligjore për kryerjen e autopsisë.