Në një të ardhme jo të largët, hapësira midis Tokës dhe Hënës mund të marrë një rëndësi strategjike të krahasueshme me Ngushtica e Hormuzit, duke u kthyer në një korridor kritik për kontrollin e aksesit drejt burimeve hënore.

Ky është vlerësimi i ekspertëve nga Qendra për Studimin e Krimit Hapësinor, Piraterisë dhe Qeverisjes, të cilët paralajmërojnë se, në vend të bllokadave detare tradicionale, në të ardhmen mund të shfaqen përpjekje për kontrollin apo ndërprerjen e “rrugëve hapësinore” drejt Hënës.

Sipas tyre, ndonëse hapësira Tokë–Hënë duket e pakufishme, ajo përmban pika të caktuara tranziti – të njohura në mekanikë orbitale – përmes të cilave duhet të kalojnë misionet hapësinore. Këto pika, për shkak të natyrës së tyre të kufizuar, mund të fitojnë rëndësi të madhe strategjike.

Interesi në rritje për këtë rajon konfirmohet edhe nga Forca Hapësinore e Shteteve të Bashkuara, e cila së fundmi ka njoftuar krijimin e një strukture të posaçme për të analizuar rolin e hapësirës Tokë–Hënë në kontekstin e sigurisë kombëtare dhe operacioneve ushtarake.

Në një intervistë për Space.com, drejtori ekzekutiv i qendrës, Marc Feldman, thekson se ngjashmëria me Ngushticën e Hormuzit qëndron në faktin se të dyja përfaqësojnë korridore të domosdoshme për kalimin e trafikut – detar në njërin rast dhe hapësinor në tjetrin.

Ai paralajmëron se, nëse këto pika strategjike do të binin nën kontroll të aktorëve armiqësorë, iniciativat hënore të NASA dhe sipërmarrësve privatë si Elon Musk mund të viheshin në rrezik, duke ndikuar drejtpërdrejt në zhvillimin e ekonomisë hapësinore, e cila pritet të arrijë vlera triliona dollarëshe në dekadat e ardhshme.