Në një traditë që vazhdon për disa vjet, pelegrinazhi në Teqenë e Shenjtë Bektashiane të Turballi Sulltanit, në Larisa të Greqisë, mblodhi besimtarë nga Shqipëria, Maqedonia e Veriut, Bullgaria, Hungaria, Turqia dhe vetë Greqia. Pavarësisht kushteve të pafavorshme të motit, besimtarët vazhduan ritualet dhe lutjet në këtë vend të shenjtë.

Ceremonia nisi me respektimin e himneve kombëtare të Greqisë, Shqipërisë dhe himnit Botëror Bektashian. Shenjtëria e Tij, Haxhi Dede Baba Edmond Brahimaj, gjatë fjalës së tij theksoi rëndësinë e Teqesë së Turballi Sulltanit si një urë lidhëse mes besimeve dhe popujve të ndryshëm.

Kryegjyshi Botëror vlerësoi kontributin e shqiptarëve në ruajtjen e identitetit kombëtar dhe shprehu besimin se me mirkuptim, bashkëpunim dhe përdorimin e rrugëve ligjore, Teqeja do të mund të afirmohet plotësisht si pjesë e trashëgimisë së Selisë së Shenjtë të Kryegjyshatës Botërore Bektashiane.

Në përfundim të ceremonisë, besimtarët bashkë me udhëheqësin e tyre shpallën lutje për paqe, dashuri dhe vëllazëri, duke dërguar një mesazh shprese dhe uniteti për shoqërinë e sotme.