Në Francë ka shpërthyer një debat i pazakontë rreth një zinxhiri restorantesh me pulë të pjekur. Edhe pse shumë njerëz frekuentojnë Master Poulet për vakte që nisin nga rreth 7 euro, ka të paktën një person që është shumë i pakënaqur me praninë e tij.

Bëhet fjalë për Karim Bouamrane, kryetar i bashkisë së Saint-Ouen dhe një figurë në rritje në Partinë Socialiste, i cili po përballet me këtë biznes jo për shkelje të rregullave urbane, zhurmë apo erëra, por për arsye që lidhen me promovimin e ushqimit më të shëndetshëm dhe të përballueshëm, sipas Financial Times.

“Kjo është një betejë ligjore, por mbi të gjitha politike”, deklaroi Bouamrane për France Télévisions, pasi bashkia humbi një seancë të parë gjyqësore për mbylljen e lokalit. “Nuk kam asnjë problem me pulën, e dua shumë, është pjata ime e preferuar”.

Megjithatë, sipas tij, Saint-Ouen ka tashmë shumë lokale që shesin pulë dhe strategjia e tij është të promovojë biznese që ofrojnë ushqim më të shëndetshëm. Ai argumenton se fakti që banorët janë kryesisht me të ardhura më të ulëta dhe emigrantë nuk do të thotë që duhet t’u ofrohet vetëm ushqim i lirë që i “izolon” më tej.

Pak ditë pas hapjes së Master Poulet, Bouamrane vendosi blloqe betoni për të penguar hyrjen në lokal, duke pretenduar se veranda ishte ndërtuar pa leje. Kompania reagoi duke paraqitur një padi urgjente për mbyllje të paligjshme. Gjykata urdhëroi heqjen e blloqeve, duke e konsideruar këtë një kufizim të lirisë së biznesit.

Lokali u rihap dhe vendosi pankarta provokuese që ironizonin kryetarin e bashkisë. Kompania publikoi edhe video satirike në rrjetet sociale, duke treguar përpjekjet e tij për të mbyllur biznesin.

Karim Bouamrane, kryetar i Saint-Ouen dhe kundërshtar i Master Poulet

Debat kulturor në Francë

Çështja e Master Poulet u shndërrua shpejt në një debat më të gjerë kulturor në Francë, që përfshin urbanizimin, ndryshimet në zakonet ushqimore dhe kërkesën për ushqim të shpejtë dhe të lehtë.

Duke qenë se zinxhiri promovon ushqimin si halal, media të krahut të djathtë e kanë akuzuar se i drejtohet komunitetit mysliman. Dyqanet halal shpesh janë një çështje e ndjeshme për të djathtën ekstreme franceze. Kryetarët e bashkive nga partia e Marine Le Pen shpesh i kritikojnë këto biznese, duke thënë se cenojnë karakterin laik të vendit.

Pavarësisht debatit, konsumi i mishit të pulës në Francë është rritur vazhdimisht në dekadat e fundit, duke kaluar edhe mishin e viçit dhe derrit në vitin 2024.

Debati ka përfshirë edhe të majtën radikale. Partia France Insoumise (LFI) e Jean-Luc Mélenchon ka përfituar nga situata për të kritikuar socialistët. Deputeti Éric Coquerel, që përfaqëson zonën ku ndodhet Saint-Ouen, mbrojti Master Poulet me një video në rrjetet sociale. “Nuk më pëlqejnë prirjet autoritare të kryetarit të bashkisë”, deklaroi ai për Financial Times.

Saint-Ouen ndodhet në departamentin Seine-Saint-Denis, zona më e varfër në Francën kontinentale, ku një e treta e popullsisë ka lindur jashtë vendit. LFI po përpiqet të zëvendësojë socialistët në këtë zonë, duke u fokusuar më shumë te emigrantët dhe shtresat në nevojë.

Ndërkohë, Bouamrane dhe drejtues të tjerë socialistë synojnë zhvillimin ekonomik të zonës dhe krijimin e vendeve më të mira të punës, si dhe tërheqjen e banorëve me të ardhura më të larta nga Parisi.

Ai ka investuar në transformimin e zonës përreth bashkisë, duke krijuar hapësira të gjelbra, restorante të reja dhe ambiente moderne, përfshirë një restorant nga shefi i njohur Thierry Marx dhe një bistrot vegjetarian.

Fast food në vendin e gastronomisë

Sipas Coquerel, Master Poulet është një element që nuk përputhet me imazhin që bashkia dëshiron të krijojë për Saint-Ouen.

Bouamrane nuk ka hequr dorë nga përpjekjet. Pasi gjykata urdhëroi heqjen e blloqeve të betonit, jashtë lokalit u vendosën vazo të mëdha portokalli, të cilat, në mënyrë ironike, përputhen me ngjyrat e markës.

Coquerel thekson se ka një qasje ndryshe për zhvillimin e zonës: ai dëshiron që banorët ekzistues të mos detyrohen të largohen për shkak të rritjes së çmimeve.

Nga ana tjetër, shumë klientë nuk duken të shqetësuar nga debati politik. Një studente 27-vjeçare deklaroi se ka probleme më të rëndësishme për t’u zgjidhur, si ndërtesat e braktisura dhe ndihma për të varfrit. Ajo shtoi se në zonë janë hapur edhe zinxhirë të tjerë ushqimi, ndaj nuk sheh arsye pse të mos funksionojë edhe Master Poulet.

Sipas analistit Jérôme Fourquet, rasti i Master Poulet është një shembull interesant i ndryshimit të kulturës ushqimore në Francë. Ai thekson se francezët po kalojnë gjithnjë e më pak kohë duke blerë produkte të freskëta, duke gatuar dhe duke ngrënë së bashku, ndryshe nga imazhi tradicional i vendit si simbol i gastronomisë dhe stilit të jetesës.