Shtetet e Bashkuara të Amerikës kanë shprehur shqetësim për vazhdimin e bllokadës politike në Kosovë, duke theksuar se kjo situatë po dëmton besimin në institucionet shtetërore.

Një zëdhënës i Departamentit të Shtetit deklaroi për “Radion Evropa e Lirë” se SHBA po i ndjek nga afër zhvillimet dhe inkurajon të gjitha forcat politike në vend që të bashkëpunojnë në interes të qytetarëve.

Sipas deklaratës, zgjatja e krizës politike po krijon pasiguri institucionale në një moment të rëndësishëm për stabilitetin e vendit. Në këtë kontekst, Kosova pritet të shkojë në zgjedhje të parakohshme parlamentare më 7 qershor, pas shpërndarjes automatike të Kuvendit për shkak të dështimit për të zgjedhur presidentin brenda afateve kushtetuese.

Kriza politike ka thelluar përplasjet mes partive. Lëvizja Vetëvendosje ka akuzuar opozitën për bojkot të qëllimshëm të seancave, ndërsa partitë opozitare kanë fajësuar pushtetin për mungesë bashkëpunimi dhe për përpjekje për përqendrim të pushtetit.

Legjislatura e dhjetë në Kosova zgjati vetëm pak muaj, duke reflektuar një periudhë të gjatë paqëndrueshmërie politike që ka nisur pas zgjedhjeve të fundit dhe dështimeve të përsëritura për formimin e institucioneve.

Analistët paralajmërojnë se situata aktuale mund të çojë në përsëritjen e skenarëve të krizës së zgjatur institucionale, duke përmendur si shembull vende që kanë kaluar cikle të shpeshta zgjedhjesh pa stabilitet të qëndrueshëm.

Ndërkohë, Komisioni Qendror i Zgjedhjeve i Kosovës ka nisur procedurat për organizimin e zgjedhjeve të 7 qershorit, përfshirë regjistrimin e partive, koalicioneve dhe listave të kandidatëve, si dhe planin financiar që kap vlerën rreth 10.8 milionë euro.

Fushata zgjedhore do të zgjasë 10 ditë, ndërsa është parashikuar edhe votimi nga diaspora dhe përfaqësitë diplomatike, në një proces që pritet të përcaktojë drejtimin politik të vendit në muajt në vijim.