Linja ajrore amerikane me kosto të ulët Spirit Airlines ka nisur ndërprerjen e operacioneve, duke pezulluar menjëherë të gjitha fluturimet dhe shërbimet për pasagjerët, në një zhvillim që pritet të ndikojë ndjeshëm në tregun ajror.

Në një deklaratë zyrtare të publikuar nga kompania, bëhet e ditur se procesi i falimentimit po shoqërohet me mbylljen e organizuar të aktivitetit, ndërsa të gjitha fluturimet janë anuluar me efekt të menjëhershëm.

Pasagjerëve u është kërkuar të mos paraqiten në aeroporte dhe të sigurojnë alternativa udhëtimi përmes kompanive të tjera ajrore.

“Jemi krenarë për ndikimin që modeli ynë ultra low-cost pati në industrinë ajrore për më shumë se tre dekada”, thuhet në reagimin e kompanisë, e cila shprehu keqardhje për ndërprerjen e aktivitetit.

Sipas mediave amerikane, vështirësitë financiare të kompanisë janë thelluar nga rritja e kostove të karburantit dhe dështimi i negociatave për një paketë shpëtimi financiar. Raportohet se bisedimet me administratën e Donald Trump dhe kreditorët kryesorë nuk arritën një marrëveshje përfundimtare.

Një nga çështjet kryesore të diskutimit ka qenë struktura e paketës së shpëtimit, e cila, sipas raportimeve, do t’i jepte qeverisë amerikane një nivel të konsiderueshëm kontrolli mbi aksionet e kompanisë.

Mbyllja e Spirit Airlines pritet të ketë pasoja të gjera në tregun ajror në Shtetet e Bashkuara të Amerikës, përfshirë rritjen e mundshme të çmimeve të biletave dhe ndërprerjen e mijëra fluturimeve.

Ndërkohë, rreth 17 mijë punonjës të kompanisë rrezikojnë të humbasin vendet e tyre të punës si pasojë e ndërprerjes së operacioneve.