TIRANË – Shqipëria do të përfaqësohet në Eurovision Song Contest 2026 me këngën “Nan”, të interpretuar nga artisti Alis, i cili e ka risjellë projektin në një version të ndërtuar mbi tingujt e pianos, në prag të garës ndërkombëtare.

Ministri i Turizmit, Kulturës dhe Sportit, Blendi Gonxhja, ndau në rrjete sociale momente nga takimi me artistin, duke vlerësuar dimensionin emocional dhe artistik të këngës përfaqësuese.

“Ministria e Turizmit, Kulturës dhe Sportit e mbështet këtë rrugëtim jo vetëm si një përfaqësim artistik, por si një zë që mbart ndjenjën, kulturën dhe shpirtin shqiptar në një skenë ndërkombëtare,” u shpreh ai.

Kënga “Nan” paraqitet si një rrëfim emocional që ndërthur thjeshtësinë me thellësinë artistike, me synimin për të prekur publikun evropian dhe për të përcjellë identitetin kulturor shqiptar përmes muzikës.

Sipas ministrit, mbështetja institucionale synon jo vetëm një përfaqësim dinjitoz në Eurovision Song Contest 2026, por edhe promovimin e kulturës shqiptare si një vlerë që kapërcen kufijtë kombëtarë.

Në përfundim, Blendi Gonxhja i uroi artistit Alis suksese në këtë garë, duke theksuar se Shqipëria pritet të vijë më pranë publikut evropian me një mesazh autentik dhe emocional.