Një nga formacionet më të njohura gjeologjike në botë, i ashtuquajturi “Syri i Saharasë”, nuk është krijuar nga përplasja e një meteori, sipas një analize të re nga NASA.

Struktura, e njohur shkencërisht si Richat Structure, ndodhet në Mauritania dhe ka një diametër prej rreth 40 kilometrash. Nga hapësira, ajo shfaqet si një formë rrethore gjigante që ngjan me një “sy”, duke shërbyer edhe si pikë orientimi për astronautët.

Sipas analizës, formacioni nuk është krater impakti, por një kupolë gjeologjike e ngritur (antiklinal), e krijuar nga procese natyrore të Tokës. Me kalimin e miliona viteve, shtresat e shkëmbinjve janë ngritur dhe më pas janë gërryer gradualisht, duke formuar unazat karakteristike që e dallojnë strukturën.

Një rol të rëndësishëm në këtë proces ka luajtur erozioni diferencial, ku shkëmbinj të ndryshëm konsumohen me ritme të ndryshme, duke krijuar relievin rrethor me shtresa të alternuara të dukshme.

Imazhet e strukturës janë marrë nga Stacioni Ndërkombëtar Hapësinor, ku ajo bie qartë në sy mes peizazhit të shkretëtirës së Saharasë. Sipas të dhënave të NASA, çdo vit nga Sahara ngrihen rreth 182 milionë ton pluhur në atmosferë, një pjesë e të cilit transportohet deri në Amazonë, duke ndikuar në ekosisteme të largëta.

Fenomeni lidhet gjithashtu me atë që njihet si “Shtresa e Ajrit Saharian”, një masë ajri e thatë dhe e ngarkuar me pluhur që udhëton mijëra kilometra dhe ndikon në kushtet atmosferike globale, përfshirë edhe formimin e stuhive tropikale.

Zbulimi i ri forcon përfundimin se “Syri i Saharasë” është rezultat i proceseve të gjata gjeologjike natyrore dhe jo i një ngjarjeje të jashtme si përplasja e një meteori.