Në Kuvendin e Kosovës pritet të mbahet në orën 23:00 tentativa e fundit për zgjedhjen e presidentit, në një proces që mbetet i pasigurt për shkak të mungesës së konsensusit mes partive politike. Nëse nuk arrihet marrëveshja, vendi mund të shkojë drejt zgjedhjeve të reja.

Kryeministri i Kosovës, Albin Kurti, ka deklaruar se nuk ka kundërshtime për asnjë kandidat të propozuar nga Lidhja Demokratike e Kosovës (LDK), por ka theksuar se kjo parti duhet të sigurojë fillimisht 15 nënshkrime për kandidatin e saj.

“Vetëm le të na i sjellin 15 nënshkrime. Ne i plotësojmë nënshkrimet që mungojnë”, është shprehur Kurti, duke shtuar se nuk garanton vota nga grupi i tij parlamentar, pasi votimi është i fshehtë.

Sipas rregullores, për zgjedhjen e presidentit kërkohen të paktën 30 nënshkrime deputetësh, ndërsa çdo deputet mund të mbështesë vetëm një kandidat.

Kurti u ka bërë thirrje partive opozitare të marrin pjesë në votim para përfundimit të afatit, duke lënë të hapur mundësinë e kompromisit në minutat e fundit.

Nga ana tjetër, përfaqësuesja e grupit parlamentar të LDK-së, Jehona Lushaku, i ka cilësuar përpjekjet aktuale si “show politik” të Lëvizjes Vetëvendosje.

Ndërkohë, shefi i grupit parlamentar të AAK-së, Besnik Tahiri, ka deklaruar se procesi nuk po zhvillohet në mënyrë demokratike dhe e ka quajtur atë manipulim politik.

Procesi i zgjedhjes së presidentit mbetet i hapur deri në votimin e fundit, ndërsa mungesa e marrëveshjes mes partive rrit pasigurinë për zhvillimet e mëtejshme institucionale.