Kryeministri i Kosovës, Albin Kurti, ka deklaruar se nuk ka kundërshtime ndaj asnjë kandidati që mund të propozohet nga Lidhja Demokratike e Kosovës (LDK) për postin e presidentit.

Kurti theksoi se kushti kryesor është që LDK të sigurojë fillimisht 15 nënshkrime për kandidatin e saj, ndërsa shtoi se pjesa tjetër mund të plotësohet.

“Le të na i sjellin 15 nënshkrime. Ne i plotësojmë nënshkrimet që mungojnë. Në kuti, votimi është i fshehtë”, u shpreh ai.

Megjithatë, kreu i qeverisë nuk dha garanci për mbështetje konkrete nga grupi i tij parlamentar, duke lënë të hapur çështjen e votës në momentin e zgjedhjes.

Sipas procedurave, për një kandidaturë për president në Kosovë nevojiten të paktën 30 nënshkrime deputetësh, ndërsa çdo deputet mund të mbështesë vetëm një kandidat.