Modelet e mëdha gjuhësore me burim të hapur të zhvilluara brenda Kinës kanë regjistruar më shumë se 10 miliardë shkarkime në mbarë botën dhe tani vendi mban numrin më të madh në botë të patentave lidhur me inteligjencën artificiale, duke përbërë rreth 60 % të kërkesave globale për patenta në këtë fushë.

Numri i kompanive vendase të inteligjencës artificiale i ka tejkaluar 6 200, ndërsa industria kryesore e inteligjencës artificiale u vlerësua në më shumë se 1.2 trilionë juanë (165 miliardë dollarë) në vitin 2025.

Kohët e fundit, disa firma vendase të teknologjisë kanë përshpejtuar përmirësimet e modeleve të tyre të inteligjencës artificiale me burim të hapur. Javën e kaluar, "DeepSeek" publikoi modelin e vet të brezit të ardhshëm "V4", ndërsa "Qwen" i "Alibaba"-s, "Kimi" i "Moonshot"-it dhe "Hunyuan" i "Tencent"-it u përditësuan gjithashtu.

Raundi i fundit i zhvillimit të modeleve është përqendruar në uljen e kostove përllogaritëse, zgjerimin e aplikacioneve në shkallë industriale, përmirësimin e aftësive të specializuara dhe përshtatjen e modeleve për përdorim në pajisjet skajore.

Me përparimet e vazhdueshme në teknologjitë thelbësore, modelet kineze me burim të hapur janë bërë një burim gjithnjë e më i rëndësishëm furnizimi dhe rritjeje brenda ekosistemit global të AI-së me burim të hapur.

Një raport i publikuar nga "Hugging Face", platforma më e madhe e inteligjencës artificiale me burim të hapur në botë, tha se 41% e shkarkimeve të modeleve të mëdha gjuhësore në këtë platformë gjatë vitit të kaluar erdhën nga modelet e zhvilluara në vend. Ai tha se Kina është bërë një nga rajonet më aktive dhe me rritjen më të shpejtë për zhvillimin e modeleve me burim të hapur.

Modelet me burim të hapur u lejojnë bizneseve, kompanive inovative fillestare dhe programuesve të pavarur të krijojnë aplikacione të personalizuara mbi modelet ekzistuese, duke zvogëluar nevojën për të krijuar sisteme të inteligjencës artificiale nga e para dhe duke ulur si kostot e zhvillimit, ashtu edhe pengesat për përshtatje.

Më parë, modelet e përparuara kontrolloheshin kryesisht nga një numër i vogël platformash të mbyllura dhe kompanitë kryesisht duhej të paguanin për t’i përdorur, sipas Zhong Xinlong, studiues në Qendrën për Zhvillimin e Industrisë së Informacionit të Kinës. "Ndërsa modelet me burim të hapur përparojnë, kompanitë mund të kryejnë zhvillim dytësor bazuar në të dhënat e tyre, proceset e biznesit dhe ekspertizën e industrisë, duke krijuar aplikacione të AI-së që janë më të përshtatshme për rastet e përdorimit praktik," vuri në dukje Zhong.

Qasja e zhvillimit të hapur po ndihmon në zgjerimin e përdorimit të inteligjencës artificiale në të gjitha industritë, duke i zhvendosur modelet vendase përtej ndërveprimit në stilin e chatbot-eve drejt mjeteve praktike të produktivitetit të përdorura në prodhim, energjetikë, transport, financë dhe sektorë të tjerë të ekonomisë reale.