PRISHTINË, 25 prill 2026 – Lëvizja Vetëvendosje (LVV), e udhëhequr nga kryeministri Albin Kurti, u ka bërë thirrje dy partive kryesore opozitare, Partia Demokratike e Kosovës (PDK) dhe Lidhja Demokratike e Kosovës (LDK), që të propozojnë së bashku tre kandidatë për postin e Presidentit të Kosovës, me synim shmangien e zgjedhjeve të parakohshme.

Sipas njoftimit të LVV-së, kërkesa është bërë publike të shtunën dhe është e vlefshme deri të dielën në mbrëmje, në një kohë kur afati kushtetues për zgjedhjen e presidentit përfundon të martën.

Partia në pushtet ka bërë të ditur se është e gatshme të tërheqë kandidatët e saj aktualë, Glauk Konjufca dhe Fatmire Mulhaxha-Kollçaku, nëse opozita paraqet tre emra konsensualë.

Vendimi është marrë gjatë mbledhjes së Kryesisë së LVV-së të premten në mbrëmje, ku është theksuar nevoja për një zgjidhje gjithëpërfshirëse.

Sipas LVV-së, kandidatët duhet të jenë figura unifikuese, me integritet të lartë qytetar e kombëtar, me kontribut të dëshmuar profesional dhe shoqëror, si dhe jashtë skenës aktuale politike.

“Një zgjidhje duhet të gjendet, sepse ajo është e mundshme. Duhet të përpiqemi dhe angazhohemi së bashku, sepse është detyrë që buron nga përgjegjësia ndaj qytetarëve të Republikës së Kosovës”, thuhet në reagimin e partisë.