Kreu i Partisë Demokratike, Sali Berisha, deklaroi gjatë një bashkëbisedimi me të rinjtë e “Brain Gain” dhe FRPD-së se Porti i Durrësit po dëmtohet rëndë nga korrupsioni, duke theksuar rëndësinë strategjike që ka ky port për vendin dhe rajonin.

Ai u shpreh se pozicioni gjeografik i Shqipërisë, si pika më perëndimore e Ballkanit, e bën vendin një nyje të rëndësishme lidhëse me Evropën dhe më gjerë, ndërsa nënvizoi se infrastruktura, veçanërisht Rruga e Kombit, ka forcuar këtë rol duke afruar portet shqiptare me rajonin dhe Evropën Qendrore.

Berisha theksoi se në marrëveshjen e Uashingtonit mes Prishtinës dhe Beogradit, të firmosur në prani të presidentit amerikan Donald Trump, ishte parashikuar ndërtimi i një hekurudhe që lidh Durrësin me Prishtinën, si dhe krijimi i një porti të thellë rajonal.

Sipas tij, këto projekte do të përbënin elementë kyç për zhvillimin ekonomik dhe integrimin rajonal, duke shfrytëzuar avantazhin strategjik të Shqipërisë dhe duke e bërë atë konkurruese me korridoret e tjera të transportit në rajon.

Ai shtoi se zhvillimi i hekurudhës, autostradës dhe portit do të krijonte kushte të favorshme për rritjen ekonomike dhe forcimin e lidhjeve ndërkombëtare, ndërsa paralajmëroi se, sipas tij, korrupsioni po rrezikon seriozisht të ardhmen e Portit të Durrësit.