Vrasje e 32 vjeçares në Greqi: Nis gjyqi ndaj 39-vjeçarit që vrau gruan me çekiç: “Veprova në gjendje të rënduar emocionale, po më zinte koka"

Një çështje e rëndë e vrasjes së një gruaje ka mbërritur në gjykatën greke. Këtë herë, gjyqtarët dhe juria e Gjykatës së Krimeve të Rënda në Athinë do të shqyrtojnë vrasjen e tmerrshme të një nëne 32-vjeçare, e zbuluar në nëntor të vitit 2024 në zonën e Ampelokipit, brenda banesës familjare.

I akuzuari është burri shqiptar që shihni në foto, bashkëshorti 39-vjeçar i të ndjerës që gjithashtu shihni në foto. Emigranti ka pranuar se e ka goditur me çekiç dhe më pas e ka mbytur me kabull gruan e tij. Kur policia mbërriti në vendngjarje, e gjeti autorin së bashku me dy fëmijët e tij, 9 dhe 12 vjeç, në hyrje të pallatit dhe e arrestoi.

Rasti kishte tronditur opinionin publik, pasi trupi i pajetë i gruas, nënë e dy fëmijëve me të akuzuarin, u gjet një javë më vonë i fshehur në papafingon e apartamentit. Gjatë kësaj kohe, 39-vjeçari shtirej i shqetësuar për zhdukjen e saj, duke pretenduar se ajo ishte larguar dhe madje kishte dërguar mesazhe se ndodhej jashtë vendit.

Gjyqi filloi me nënën e viktimës, e cila po paraqitet në mbështetje të akuzës, duke marrë qëndrim si dëshmitare e parë. I pandehuri 39-vjeçar ka pranuar se ka plagosur gruan e tij dhe nënën e fëmijëve të tij me një çekiç dhe më pas e ka mbytur atë me një kabllo. Derisa gruaja e vdekur u gjet në papafingo të apartamentit të tyre, vrasësi bashkëshortor pretendoi se viktima ishte larguar nga shtëpia dhe po dërgonte mesazhe se ndodhej jashtë vendit.

Autori i krimit, i cili gjatë marrjes në pyetje nga gjyqtarja hetuese kishte deklaruar se e vrau nga xhelozia, sot në sallën e gjyqit ndryshoi version, duke thënë se veproi në gjendje të rënduar emocionale.

“E kundërshtoj akuzën në formën si është paraqitur. Isha në një gjendje të rënduar emocionale, nuk isha i qetë mendërisht, po më zinte koka dhe, siç thuhet në aktakuzë, nuk kishte paramendim. Gjithçka ndodhi në atë moment. Dua të kërkoj falje të madhe nga fëmijët e mi që u mora nënën e tyre dhe një falje të madhe nga familja e saj”, deklaroi 39-vjeçari para trupit gjykues, duke dhënë sinjalin e linjës mbrojtëse që do të ndjekë.

Për sjelljen e tij pas krimit dëshmoi edhe nëna e viktimës, e cila është paraqitur si palë mbështetëse e akuzës.

“I akuzuari më telefonoi dhe bënte sikur ishte i shqetësuar për vajzën time. Më tha se kishte marrë valixhen dhe ishte larguar. Mendova mos kishte shkuar në Shqipëri. Vajza më thoshte se ishte e mërzitur, se punonte shumë, bënte tre punë. Më kishte treguar se nuk ishte e lumtur në shtëpi, por jo se do ta linte burrin. Nuk dua t’i bëjnë asgjë, dua të ma kthejë vajzën. A mundet?”, tha mes lotësh nëna e viktimës.

Nga ana tjetër, vëllai i të akuzuarit e përshkroi atë si “baba të mirë, bashkëshort të mirë dhe vëlla të mirë”, duke theksuar se nuk kishte krijuar probleme në jetën e tij.

Seanca gjyqësore do të vijojë më 26 maj.

Çfarë ndodhi në Ampelokipi: Burri e fshehu trupin e bashkëshortes në papafingo

Një rast tronditës i vrasjes së një gruaje është regjistruar në Greqi, në zonën e Ampelokipit, duke shkaktuar reagime të forta në opinionin publik. Zbulimi u bë më 5 dhjetor 2024, raporton noa.al.

Autori i dyshuar, një 39-vjeçar, ka pranuar se ka vrarë bashkëshorten e tij duke përdorur një çekiç. Sipas informacioneve paraprake, ai ka telefonuar policinë më dhjetor 2024 dhe ka deklaruar se krimin e kishte kryer që të enjten e kaluar.

Pas telefonatës, forcat e Policisë greke janë nisur drejt banesës, një apartament në katin përdhe në rrugën Lakonias, ku janë përballur me një skenë të rëndë.

Trupi i pajetë i gruas u gjet i fshehur në papafingon e shtëpisë. Autori e kishte mbuluar me qese të zeza, ndërsa era e rëndë tregonte se trupi kishte qëndruar aty për rreth shtatë ditë.

Autoritetet kanë urdhëruar që vendi i ngjarjes të mos preket, deri në mbërritjen e ekspertëve të kriminalistikës dhe mjekut ligjor, për të siguruar çdo provë të mundshme.

Ndërkohë, 39-vjeçari ka qëndruar në vendngjarje dhe është arrestuar nga policia pas pranimit të krimit.