Kryeministri Edi Rama, i cili ndodhet në Greqi për një vizitë pune me ftesë të Forumit Ekonomik të Delphit, ka zhvilluar sot një takim me homologun e tij grek, Kyriakos Mitsotakis, ku në fokus kanë qenë marrëdhëniet dypalëshe dhe bashkëpunimi mes dy vendeve.

Gjatë takimit është diskutuar për forcimin e marrëdhënieve Shqipëri–Greqi, zgjerimin e bashkëpunimit ekonomik dhe ecurinë e punës për hartimin e një dokumenti të ri të partneritetit strategjik, për të cilin janë angazhuar ekipet e ministrive të jashtme të të dy vendeve.

Në një reagim publik, Kryeministri Rama theksoi se marrëdhënia me Mitsotakis shkon përtej bashkëpunimit institucional, duke e cilësuar atë si një miqësi të ndërtuar mbi ambicien e përbashkët për modernizimin e vendeve dhe për ngritjen e marrëdhënieve shqiptaro-greke në një nivel të ri.

Ai shtoi gjithashtu se po punohet për të adresuar përfundimisht çështjet e mbartura mes dy shteteve, me synimin që brenda këtij viti të arrihet një marrëveshje e re strategjike.

Në vijim të agjendës së tij, Kryeministri Rama do të marrë pjesë në punimet e Forumit Ekonomik të Delphit, ku pritet të zhvillojë takime të tjera me liderë dhe përfaqësues të ekonomisë ndërkombëtare.