TEPELENË, 21 prill 2026 – Policia ka zbardhur detaje të reja lidhur me ngjarjen e rëndë të ndodhur mbrëmjen e sotme në Memaliaj, ku një person humbi jetën si pasojë e të shtënave me armë zjarri.

Sipas njoftimit zyrtar, rreth orës 20:50, pas një konflikti të çastit, shtetasi Daniel Nela 29 vjeç, dyshohet se ka qëlluar me armë zjarri shtetasin Endri Goxhaj, 30 vjeç, i cili ka ndërruar jetë gjatë transportimit për në spital.

Nga të shtënat ka mbetur i plagosur edhe vëllai i autorit të dyshuar, shtetasi Dali Nela, 25 vjeç, i cili ndodhet jashtë rrezikut për jetën. Rrethanat e plagosjes së tij mbeten ende të paqarta.

Pas kryerjes së krimit, autori i dyshuar është larguar nga vendngjarja me automjet, ndërsa shërbimet e policisë janë vënë në ndjekje të tij. Paralelisht, është ngritur një grup i posaçëm hetimor, nën drejtimin e Prokurorisë, për zbardhjen e plotë të rrethanave dhe dokumentimin ligjor të ngjarjes. Njoftimi

Rreth orës 20:50, në Memaliaj, dyshohet se pas një konflikti, shtetasi D. N., 29 vjeç, ka qëlluar me armë zjarri shtetasin E. G., 30 vjeç, i cili ka humbur jetën rrugës për në spital. I plagosur, në rrethana ende të paqarta, ka mbetur edhe vëllai i autorit të dyshuar, shtetasi D. N., 25 vjeç, jashtë rrezikut për jetën.

Autori i dyshuar, pas ngjarjes, është larguar me automjet. Shërbimet e Policisë janë vënë në ndjekje të tij. Ndërkohë, është ngritur një grup i posaçëm hetimor, në drejtimin e Prokurorisë, për sqarimin e rrethanave dhe dokumentimin ligjor të ngjarjes.