Abu Dhabi / Tiranë – Kryeministri Edi Rama zhvilloi një vizitë zyrtare në Abu Dhabi, ku përveç takimit me Presidentin e Emirateve të Bashkuara Arabe, Mohammed bin Zayed Al Nahyan, u takua edhe me drejtuesin ekzekutiv të kompanisë G42, Peng Xiao.

Takimi ka tërhequr vëmendje pasi lidhet me projektin “Smart City”, një investim prej 118.5 milionë dollarësh për instalimin e kamerave inteligjente në Shqipëri, i cili do të zbatohet nga kompania Presight AI.

Në delegacionin shqiptar që mori pjesë në takim përfshiheshin edhe drejtuesja e Shërbimit Informativ të Shtetit, Vlora Hyseni, deputeti Ulsi Manja dhe zëvendësministri i Brendshëm, Xhemal Qefalia, ky i fundit edhe zyrtari që ka firmosur marrëveshjen me kompaninë nga Emiratet.

Sipas një reagimi për BIRN, Këshilli i Ministrave bëri të ditur se takimi kishte si qëllim “eksplorimin dhe diskutimin e mundësive dhe potencialit të bashkëpunimit”.

Projekti “Smart City” parashikon vendosjen e mijëra kamerave në hapësira publike, përfshirë rrugë, shkolla dhe pika kufitare, me qëllim monitorimin e sigurisë dhe trafikut. Ai është shpallur projekt me rëndësi kombëtare nga qeveria shqiptare.

Fillimisht, kostoja e projektit ishte parashikuar rreth 60 milionë dollarë, por më pas ajo është rritur në 118.5 milionë dollarë, ndërsa financimi pritet të sigurohet përmes një huaje nga një fond zhvillimi i Abu Dhabit.

Ndërkohë, projekti ka ngjallur debat publik dhe kritikë nga ekspertë të të drejtave digjitale, të cilët kanë ngritur shqetësime mbi ndikimin e tij në privatësinë e qytetarëve, për shkak të nivelit të lartë të mbikëqyrjes në hapësirat publike.

Gjithashtu, kompania zbatuese është përballur me shqyrtime ndërkombëtare lidhur me lidhjet e saj të mundshme me kompani kineze, çka ka shtuar vëmendjen mbi këtë investim. Burimi: BIRN