Durrës – Një 32-vjeçar është vënë në pranga nga Policia e Durrësit, pasi u kap duke qarkulluar i armatosur pa leje, në kuadër të operacionit të koduar “Mesnata”.

Sipas njoftimit zyrtar të Policia e Shtetit, operacioni u zhvillua nga shërbimet e Forcës së Posaçme “Shqiponja”, në bashkëpunim me specialistët për Hetimin e Krimeve të Komisariatit të Policisë Durrës, bazuar në informacione të siguruara në rrugë operative.

Gjatë ndërhyrjes në lagjen nr. 18, shërbimet e policisë ndaluan një automjet me drejtues shtetasin me iniciale E. K. Gjatë kontrollit fizik, atij iu gjet në një çantë marsup një armë zjarri pistoletë, të cilën e posedonte pa leje.

Kontrollet e mëtejshme në banesën e tij çuan në zbulimin e një sasie municioni luftarak, i cili u sekuestrua në cilësinë e provës materiale.

Nga verifikimet rezultoi gjithashtu se 32-vjeçari drejtonte automjetin pa leje drejtimi.

Në përfundim të veprimeve procedurale, u bë arrestimi në flagrancë i tij për veprat penale “Mbajtja pa leje dhe prodhimi i armëve, armëve shpërthyese dhe i municionit” si dhe “Drejtimi i automjeteve në mënyrë të parregullt”.

Materialet procedurale i janë referuar Prokurorisë pranë Gjykatës së Juridiksionit të Përgjithshëm Durrës, për veprime të mëtejshme.