Tetë fëmijë të moshës nga një deri në 14 vjeç kanë humbur jetën si pasojë e një sulmi me armë zjarri në qytetin Shreveport, në shtetin e Luiziana, në Shtetet e Bashkuara të Amerikës.

Sipas raportimeve të mediave ndërkombëtare, ngjarja e rëndë ndodhi në orët e para të mëngjesit të së dielës, ku në total u qëlluan me armë zjarri 10 persona. Autoritetet bëjnë me dije se viktimat janë pjesë e një grupi familjar, ndërsa dyshohet se ngjarja ka nisur pas një konflikti brenda familjes.

Policia njoftoi se autori i dyshuar u neutralizua nga forcat e rendit pas një ndjekjeje me automjet, pasi ishte larguar nga vendi i ngjarjes dhe kishte vjedhur një makinë në afërsi të kryqëzimit të rrugëve West 79th dhe Lynnwood.

“I dyshuari, pasi u largua nga vendngjarja, vodhi një automjet pranë kryqëzimit të West 79th dhe Lynnwood. Oficerët e ndoqën dhe ne besojmë se ai ishte personi i vetëm që qëlloi në këto pika,” deklaroi një zëdhënës i policisë.

Autoritetet vijojnë hetimet për të zbardhur plotësisht rrethanat dhe motivet e kësaj ngjarjeje të rëndë, e cila ka tronditur opinionin publik në SHBA.