Ushtruesja e detyrës së presidentes së Kosovës, Albulena Haxhiu, ka bërë thirrje për arritjen e një konsensusi mes forcave politike për zgjedhjen e kreut të ri të shtetit, duke theksuar se vendi duhet të shmangë zgjedhjet e jashtëzakonshme.

Gjatë një deklarate për mediat, ajo u shpreh se kjo javë është vendimtare dhe se ekziston mundësia që marrëveshja të arrihet nëse ka vullnet politik.

Haxhiu theksoi se nuk është në përgjegjësinë e saj të thërrasë partitë në tryezë, duke shtuar se ftesat po bëhen nga kryeministri Albin Kurti, në cilësinë e liderit të partisë në pushtet.

Ajo u bëri thirrje partive që t’u përgjigjen pozitivisht këtyre ftesave, duke theksuar se dialogu është i domosdoshëm për të arritur një marrëveshje për presidentin ose presidenten e ardhshme.

Ndërkohë, zëvendëskryeministri dhe ministri i Jashtëm, Glauk Konjufca, ka deklaruar se zgjedhja e presidentit varet edhe nga qëndrimi i opozitës, duke paralajmëruar mundësinë e zgjedhjeve të reja në mungesë të dakordësisë.

Procesi mbetet i bllokuar për shkak të mungesës së votave të mjaftueshme në Kuvend, ndërsa afati i vendosur nga Gjykata Kushtetuese për zgjedhjen e presidentit është 28 prilli. Në të kundërt, vendi pritet të shkojë në zgjedhje të reja brenda 45 ditësh.