Finalja e mbrëmjes së djeshme kurorëzoi Selim Bollatin si fituese, por jo gjithçka ka kaluar pa polemika pas spektaklit.

Një nga finalistët, Rogerti, i cili u eliminua i pari nga katërshja finale, është shfaqur dukshëm i zhgënjyer nga rezultati.

Menjëherë pas daljes nga gara, ai u pa i tensionuar dhe u largua shpejt nga studioja, ndërsa e njëjta atmosferë ngarkese u reflektua edhe tek mbështetësit e tij të afërt.

Reagimet vazhduan edhe në rrjetet sociale, ku Rogerti u shfaq në një video krah reperit Don Phenom. Ky i fundit e quajti publikisht “fituesin e vërtetë”, duke i dhënë mbështetje të hapur.

Megjithatë, më shumë vëmendje mori deklarata e Rogertit. Në një mesazh për ndjekësit e tij, ai u kërkoi të mos shqetësoheshin, ndërsa shtoi: “Këto lojëra janë bërë për politikën, nuk janë bërë për njerëzit e vërtetë”.

Rogerti ka qenë një nga figurat më kontraverse të këtij sezoni, duke u renditur ndër personazhet më antagonistë jo vetëm këtë vit, por në historinë e këtij formati.