Një 68-vjeçar italian ka ndërruar jetë në spital një javë pas një aksidenti të rëndë rrugor në Treviso, pasi ishte përplasur nga një automjet SUV i drejtuar nga një shtetas shqiptar.

Ngjarja ndodhi të premten e 10 prillit, në zonën e Ponte di Piave, në Piazza Garibaldi, rreth orës 09:00 të mëngjesit, teksa viktima po kalonte rrugën.

Pensionisti, i identifikuar si Ettore Parisi, u transportua me urgjencë në spitalin Ca’ Foncello Hospital, ku qëndroi në repartin e kujdesit intensiv në gjendje kritike. Pavarësisht përpjekjeve të mjekëve, ai nuk mundi t’u mbijetojë plagëve dhe ndërroi jetë pas një jave.

Sipas autoriteteve italiane, drejtuesi i mjetit, një 42-vjeçar shqiptar banues në zonë, ndodhet nën hetim për vrasje nga pakujdesia në trafik. Prokuroria e Treviso ka hapur procedurat për zbardhjen e plotë të rrethanave të aksidentit, ndërsa ende po hetohet nëse viktima po kalonte në vijat e bardha në momentin e përplasjes.