Banorët e prekur nga zjarri që përfshiu një pallat pranë Farmacia nr. 10 në Tiranë do të mbështeten me bonus qiraje deri në rikthimin në banesat e tyre, të cilat pritet të riparohen plotësisht.

Kryeministri Edi Rama deklaroi se procesi i rikonstruksionit do të realizohet nga ndërtuesi i objektit, ndërsa shteti do të garantojë mbështetje për familjet e prekura gjatë kësaj periudhe.

“Banorët e prekur nga zjarri do të mbështeten me bonuse qiraje, deri në rikthimin e tyre në pallatin e riparuar 100%,” u shpreh Rama në një reagim publik.

Sipas autoriteteve, bonusi i qirasë pritet të jepet për një periudhë nga 6 muaj deri në 1 vit, në varësi të ecurisë së punimeve dhe kushteve të akomodimit të familjeve të prekura.

Ndërkohë, janë duke u përgatitur ndryshimet ligjore për miratimin e skemës së mbështetjes në Këshilli Bashkiak i Tiranës brenda një muaji.

Zëvendëskryeministrja Albana Koçiu ka theksuar se paralelisht po vijojnë hetimet për të përcaktuar përgjegjësitë e mundshme, ndërsa një grup ekspertësh po vlerëson masat parandaluese për raste të ngjashme në të ardhmen.

Sipas të dhënave paraprake, nga zjarri u dëmtuan plotësisht rreth 30 apartamente, ndërsa 8 persona u dërguan në spital për shkak të asfiksisë.

Ndërtuesi i objektit ka deklaruar se nuk mban përgjegjësi ligjore për ngjarjen, por ka marrë përsipër rikonstruksionin e plotë të pallatit. Autoritetet kanë konfirmuar më herët se, sipas vlerësimeve paraprake, zjarri nuk lidhet me cilësinë e ndërtimit.