Një ngjarje e rëndë është regjistruar në Ferizaj, ku një nxënës 15-vjeçar ka humbur jetën pasi është rrëzuar papritur gjatë orës së edukimit fizik.

Sipas njoftimit të policisë, ngjarja ka ndodhur në shkollën e mesme Kuvendi i Arbërit, rreth orës 15:15, kur nxënësi është rrëzuar pa ndjenja në sallën e sportit, në rrethana ende të panjohura.

Ai është dërguar me urgjencë në Qendra Emergjente Ferizaj, ku, pavarësisht ndërhyrjes mjekësore, ka ndërruar jetë.

Lajmi është konfirmuar nga zëdhënësi i policisë për rajonin e Ferizajt, Kanun Veseli, i cili bëri të ditur se menjëherë pas ngjarjes janë njoftuar hetuesit dhe janë ndërmarrë veprimet e para hetimore.

Trupi i pajetë i të miturit është dërguar në Institutin e Mjekësisë Ligjore, ku pritet të kryhet ekspertiza për të përcaktuar shkaqet e sakta të vdekjes.

Autoritetet kanë nisur hetimet për zbardhjen e plotë të rrethanave të kësaj ngjarjeje tragjike.