Gjykata e Posaçme Kundër Korrupsionit dhe Krimit të Organizuar (GJKKO) ka shpallur fajtor deputetin dhe ish-kryebashkiakun e Shkodër, Bardh Spahia, për veprën penale “pengimi i ekzekutimit të vendimit gjyqësor”.

Sipas vendimit, Spahia është dënuar me 100 mijë lekë gjobë, një masë më e ulët nga ajo e kërkuar nga Struktura e Posaçme kundër Korrupsionit dhe Krimit të Organizuar (SPAK), e cila kishte kërkuar 700 mijë lekë gjobë.

Çështja lidhet me moszbatimin e një vendimi gjyqësor të vitit 2022, që urdhëronte rikthimin në detyrë të një drejtuesi të shkarkuar më parë. Në cilësinë e kryetarit të Asamblesë së Përgjithshme të Ujësjellës Kanalizimeve Shkodër, Spahia kishte vendosur shkarkimin e administratorit Mark Molla dhe emërimin në vend të tij të Arvit Bushati.

Pas ankimimit në gjykatë, Molla fitoi çështjen dhe gjykata vendosi pezullimin e akteve deri në një vendim përfundimtar. Megjithatë, sipas SPAK, edhe pse ishte njohur me vendimin, Spahia nuk e zbatoi atë.

Përkundrazi, ai ka nxjerrë disa ditë më vonë vendime të tjera, duke përsëritur shkarkimin e Mollës dhe emërimin e të njëjtit administrator, veprime që u konsideruan si përpjekje për të penguar ekzekutimin e vendimit gjyqësor të Gjykata e Shkodrës.