Italia dhe Shqipëria janë tronditur nga vrasja e 22-vjeçares shqiptare Ilaria Sula, e cila u vra nga i dashuri i saj filipinas, Mark Samson. Familja e saj ka ndarë detaje të fundit nga komunikimi me të bijën, duke rrëfyer momentet e fundit para tragjedisë.

Në një intervistë për emisionin “Me Zemër të Hapur”, babai i saj, Flamur Sula, tha se telefonata e fundit me vajzën kishte qenë e qetë dhe e zakonshme, pa asnjë shenjë shqetësimi.

Sipas tij, biseda kishte zgjatur rreth 15 minuta, ku kishin diskutuar për jetën e përditshme dhe studimet, ndërsa e reja u kishte thënë se do të kthehej në shtëpi pas disa ditësh.

Ai rrëfeu se familja kishte planifikuar ta priste në shtëpi, por mungesa e kontaktit dhe telefoni i fikur më vonë i kishte alarmuar.

“Që të martën nuk folëm më me të, ndërsa më parë flisnim pothuaj çdo ditë. Kur sms-ja nuk kaloi dhe telefoni dilte i fikur, u shqetësuam menjëherë”, u shpreh ai.

Babai shtoi se kjo situatë ishte e pazakontë për të bijën dhe se familja fillimisht mendoi se mund të kishte humbur telefonin, por më pas kuptoi se diçka serioze kishte ndodhur.

Familja e Ilaria Sula thekson se tashmë jeton vetëm për të kërkuar drejtësi dhe zbardhjen e plotë të ngjarjes tragjike.