Një ngjarje e rëndë ka tronditur ishullin grek të Kefalonia, ku 19-vjeçarja shqiptare Myrto është gjetur pa shenja jete në orët e para të mëngjesit në zonën e Argostoli.

Sipas autoriteteve greke, tre të rinj të moshave 26, 23 dhe 22 vjeç janë vënë nën hetim dhe janë paraqitur para drejtësisë, mes tyre edhe një ish-peshëngritës 26-vjeçar, i cili ka deklaruar se e ka nxjerrë vajzën pa ndjenja nga ambienti ku ndodheshin dhe se është njoftuar urgjenca. Megjithatë, hetimet paraprake paraqesin një version të ndryshëm të ngjarjes.

Fillimisht të dyshuarit u akuzuan për vepra që lidhen me drogën dhe mosdhënien e ndihmës, por më pas akuza është rënduar në “vrasje me dashje përmes mosveprimit”, duke e kthyer çështjen në një hetim penal shumë më të rëndë.

Sipas hetimeve, tre të rinjtë dyshohet se ndodheshin me viktimën në një dhomë hoteli dhe nuk i kanë dhënë ndihmë kur ajo ka humbur ndjenjat. Më pas, dyshohet se e kanë nxjerrë jashtë dhe e kanë braktisur në një shesh, ku është gjetur pa ndjenja.

Pamjet e kamerave të sigurisë janë bërë pjesë kyçe e hetimit, ku raportohet se shihet momenti kur 26-vjeçari e nxjerr vajzën jashtë hotelit.

Autoritetet po hetojnë gjithashtu dyshime për manipulim të provave, përfshirë pastrimin e dhomës dhe zhdukjen e telefonit të viktimës, i cili më vonë është gjetur i braktisur.

Sipas ekspertizës mjeko-ligjore, vdekja dyshohet të ketë ardhur si pasojë e arrestit kardiak të shkaktuar nga edema pulmonare, ndërsa rezultatet toksikologjike pritet të sqarojnë më tej rrethanat.

Ndërkohë, familja i ka dhënë lamtumirën e fundit 19-vjeçares mes dhimbjes së madhe. Babai i saj ka deklaruar se dyshon për një ngjarje më të gjerë dhe kërkon zbardhjen e plotë të së vërtetës.

Hetimet vijojnë për të përcaktuar përgjegjësitë dhe rrethanat e plota të kësaj ngjarjeje tragjike.