Komuniteti lokal i Argostolit në Kefaloni të Greqisë është në zi pas vdekjes tragjike të 19-vjeçares Myrto, vajza e një nëne shqiptare dhe babai vendas që vdiq në rrethana ende të paqarta.

Sot, në orën 15:00, do të zhvillohet ceremonia mortore në Mitropolinë e qytetit dhe e ndjera do të përcillet në banesën e fundit.

Ndërkohë, sot në orën 10:00 paradite pritet që të tre të arrestuarit për vdekjen e vajzës të dalin para drejtësisë për të dhënë dëshmitë e tyre. Ata akuzohen për vrasje me dashje përmes mosveprimit dhe për raste të rënda të posedimit dhe përdorimit të lëndëve narkotike.

Në të njëjtën kohë, dalin në dritë gjithnjë e më shumë detaje për natën tragjike, duke tronditur opinionin publik.

“E ngacmonin sepse nuk pranonte, nuk iu dorëzua”

Babai i vajzës, dukshëm i tronditur, foli për median greke dhe deklaroi:

“E ngacmonin seksualisht, i shkonin pas. Sepse vajza ime nuk pranonte, ata zbatuan një plan: ajo njohu një djalë përmes Facebook-ut. Ai është nga i njëjti fshat me njërin prej tyre dhe e ftuan të vinte në Kefaloni për t’u njohur. Ishte vajzë e pastër, e pafajshme dhe pranoi.”

“Para jush kishit një vajzë të mrekullueshme dhe po mendonit si ta përdornit për një lidhje. Pse ma vranë fëmijën?”, shtoi ai.

Nëna e Myrtos, e shkatërruar emocionalisht, tha:

“Dua të shkoj tani në polici dhe t’i pyes pse ia bënë këtë vajzës sime. Të paktën pse nuk e çuan në spital. U humb kohë. Unë do iki bashkë me vajzën time.”

Më herët, një shoqe e 19-vjeçares kishte bërë një denoncim anonim për 23-vjeçarin me të cilin ajo kishte shkuar në Airbnb atë natë.

Ajo deklaroi: “Unë besoj se i kishin ngritur kurth, për ta futur në prostitucion. Myrto ishte shumë e bukur. E kishte njohur 23-vjeçarin online dhe në fillim e kishte refuzuar. Prandaj mendoj se ishte kurth dhe ai i kishte thënë ‘do të të gjej dhe do të të vras’.”

Si ndodhi ngjarja

Myrto kishte shkuar mbrëmjen e së hënës në një apart-hotel në qytet me një 23-vjeçar. Disa orë më vonë, rreth orës 02:00 të mëngjesit, ai dyshohet se i propozoi përdorimin e kokainës. Në dhomë u thirr edhe një 26-vjeçar, ish-peshëngritës, i cili dyshohet se solli substancat dhe konsumoi bashkë me ta.

Më pas, 26-vjeçari u largua dhe u kthye sërish me një sasi tjetër, këtë herë i shoqëruar nga një 22-vjeçar me origjinë shqiptare, i cili sipas policisë nuk konsumoi.

Në atë moment dyshohet se 19-vjeçarja u rrëzua dhe humbi ndjenjat pas përdorimit të kokainës. Pamjet nga kamerat e sigurisë rezultuan vendimtare.

Në to shihet vajza pa ndjenja, ndërsa 26-vjeçari e mban në krahë dhe vrapon për ta nxjerrë nga apartamenti ku ajo qëndronte me 23-vjeçarin.

Më pas, të arrestuarit e lanë pa ndjenja në një shesh në qendër të Argostolit dhe njoftuan një shoqe të saj, e cila thirri ambulancën. Por për Myrton ishte tashmë tepër vonë.