BARCELONË, 17 prill – Kryeministri i Shqipërisë, Edi Rama, ndodhet sot në Spanja, ku po vijon axhendën e tij ndërkombëtare pas vizitës zyrtare në Itali.

Rama do të marrë pjesë në samitin e katërt “Në Mbrojtje të Demokracisë”, i organizuar në Barcelona, me ftesë të kryeministrit spanjoll, Pedro Sánchez.

Sipas njoftimeve zyrtare, diskutimet në këtë samit do të përqendrohen në çështje kyçe si multilateralizmi dhe rregullimi i mjedisit dixhital, me theks të veçantë në luftën kundër dezinformimit.

Në kuadër të aktivitetit, kreu i qeverisë shqiptare pritet të zhvillojë edhe takime të veçanta dypalëshe me homologun e tij spanjoll, si dhe me Presidentin e Këshillit Evropian, António Costa.

Vizita në Spanjë vjen menjëherë pas qëndrimit në Romë, ku Rama u takua me kryeministren italiane, Giorgia Meloni. Në fokus të këtij takimi ishte forcimi i bashkëpunimit dypalësh, veçanërisht në fushat e emigracionit dhe mbrojtjes.

Ky bashkëpunim mbështetet edhe në 16 marrëveshjet e nënshkruara gjashtë muaj më parë mes dy vendeve, të cilat përfshijnë sektorë si shëndetësia, siguria dhe infrastruktura.