DIBËR – Dy punonjës policie janë pezulluar nga detyra dhe janë vënë nën masën e ndalimit për të dalë jashtë vendit, me vendim të Prokurorisë pranë Gjykatës së Shkallës së Parë në Dibër, në lidhje me një ngjarje të rëndë të ndodhur në Bulqizë.

Bëhet fjalë për dy inspektorë policie, një i sektorit të qarkullimit rrugor dhe një i rendit publik, të cilët ushtronin detyrën në Komisariatin e Bulqizës.

Sipas hetimeve paraprake, ata dyshohen për shpërdorim detyre dhe mosveprim gjatë ndërhyrjes në një incident të ndodhur më 10 mars 2026, ku mbetën të plagosur rëndë tre persona.

Hetimet kanë nxjerrë në pah se efektivët nuk kanë përmbushur detyrimet ligjore në menaxhimin e situatës, çka ka sjellë ndërhyrjen e Agjencia e Mbikëqyrjes Policore.

Ndaj tyre është vendosur pezullimi nga detyra, ndërsa vijojnë hetimet për zbardhjen e plotë të rrethanave të ngjarjes dhe për të përcaktuar nëse ka persona të tjerë të përfshirë.