Struktura e Posaçme kundër Korrupsionit dhe Krimit të Organizuar (SPAK) ka marrë sërish në pyetje Reni Ashikun, administrator i “Converse Management Consulting (CMC)”, në kuadër të hetimeve që lidhen me menaxhimin e fondeve të programit IPARD të Bashkimit Europian.

Hetimet përqendrohen te mënyra e shpërndarjes dhe administrimit të fondeve të dedikuara për zhvillimin e bujqësisë dhe zonave rurale, një program mbështetës i Bashkimit Evropian.

Në këtë çështje është përfshirë edhe ish-ministrja e Bujqësisë, Frida Krifca, e cila figuron e kallëzuar në kuadër të hetimeve.

Sipas burimeve hetimore, Ashiku është paraqitur për të dytën herë në SPAK, ndërsa autoritetet po verifikojnë rolin e tij dhe të personave të tjerë të përfshirë në administrimin e fondeve IPARD.

Për momentin nuk janë bërë publike detaje të plota mbi përgjegjësitë individuale të të përfshirëve, ndërsa hetimet vijojnë ende.