Prokuroria pranë Gjykatës së Shkallës së Parë të Juridiksionit të Përgjithshëm Vlorë ka përfunduar hetimet dhe ka dërguar për gjykim 7 persona, mes tyre ish-zyrtarë të Inspektoratit të Mbrojtjes së Territorit (IMT) Himarë, të akuzuar për shpërdorim detyre dhe ndërtim të paligjshëm.

Çështja lidhet me hetimet për ndërtimet e paligjshme në zonën “Kodra e Rrapojve”, Himarë, ku sipas prokurorisë, të pandehurit kanë vepruar në kundërshtim me ligjin gjatë ushtrimit të funksioneve të tyre publike, duke dëmtuar interesat e shtetit dhe të subjekteve të tjera.

Sipas njoftimit zyrtar, në gjyq janë dërguar këta shtetas:

M.B., i akuzuar për “ndërtim të paligjshëm” (neni 199/a/4 i Kodit Penal) B.M., i akuzuar për “ndërtim të paligjshëm” (neni 199/a/4 i Kodit Penal) Sh.T., i akuzuar për “ndërtim të paligjshëm” (neni 199/a/4 i Kodit Penal) R.H., ish-kryeinspektor i IMT Bashkia Himarë, i akuzuar për “shpërdorim detyre” (neni 248 i Kodit Penal) M.N., ish-kryeinspektor i IMT Bashkia Himarë, i akuzuar për “shpërdorim detyre” (neni 248 i Kodit Penal) E.Z., ish-inspektor i IMT Bashkia Himarë, i akuzuar për “shpërdorim detyre” (neni 248 i Kodit Penal) R.K., ish-inspektor i IMT Bashkia Himarë, i akuzuar për “shpërdorim detyre” (neni 248 i Kodit Penal)

Prokuroria thekson se hetimet kanë evidentuar shkelje të detyrës nga zyrtarët përgjegjës, të cilët dyshohet se kanë lejuar ose nuk kanë parandaluar ndërtimet e paligjshme në zonën në fjalë.

Çështja pritet të vijojë në gjykatë për shqyrtim të mëtejshëm të përgjegjësisë penale të të pandehurve.